Не игра фудбал за пари, уште помалку му е важна платата, едноставно сака да игра фудбал на професионално ниво. Но, некои работи во животот ни со пари не можат да се купат.
Најбогатиот фудбалер на светот, Фаик Болкија, беше принуден да го напушти португалскиот Маритиму откако и таму не ја најде среќата.
Болкија, кој е братучед на пребогатиот султан од Брунеи, Хасанал Болкија, и син на принцот Џефри Болкија, очајнички се обидува да го изгради своето име во светот на фудбалот. Сепак, од самиот почеток неговата кариера тргна во надолна линија.
Крилниот напаѓач и капитен на репрезентацијата на Брунеи го напушти португалскиот Маритиму откако не успеа да се избори за минутажа ниту во резервниот тим на овој клуб. Во Португалија пристигна од англиски Лестер каде исто така го носеше дресот на резервниот тим.
Болкија (23) помина низ младинската школа на англиските фудбалски клубови. Играше за Саутемптон и Челси пред да ѝ се приклучи на академијата на Лестер во 2016 година. Игра на позицијата десно офанзивно крило, но досега во кариерата нема одиграно ни 5 официјални натпревари.
„Постигнавме договор со Фаик Болкија за раскин на договорот. Благодарни сме за посветеноста што ја покажа во служба на клубот и му посакуваме среќа во иднина“, изјавија од Маритиму.
По болната разделба, прашање е каде и дали Болкија, кој поседува богатство од 13 милијарди фунти, ќе ја продолжи фудбалската кариера.
Зошто да не во некој македонски клуб? Па можеби ќе се изроди и некаква инвестиција од неговата богата фамилија...
