Роверот Curiosity на НАСА, што се наоѓа на Марс, откри необично парче метеорит, кој главно се состои од никел и железо. Името што го доби е: Cacao (какао).
Curiosity сега ја истражува планината Шарп во кратерот Гејл. Метеоритот не е особено голем - има дијаметар од околу 30 сантиметри е еден од откриените неколку метеорити во тоа подрачје... Но, само уште еден е „метален“ - т.н. Egg Rock (камено јајце) бил откриен 2016 година, со големина на топче за голф.
Никелни и железни метеорити се меѓу најретките видови и сочинуваат околу 6% од познатите метеорити. Cacao и визуелно се издвојува од својата околина. Имено, површината на Марс е црвена поради оксидите, а метеоритот е темно-сив и изгледа како метал. Освен тоа, тој е прилично мазен и заоблен во одредени делови, што укажува дека минал низ атмосферата на планетата пред да се забие во нејзината површина.
Иако атмосферата на Марс е многу потенка од онаа на Земјата, таа сепак создава доволно триење за да ја загрее површината на метеоритот. Вдлабнатините на Cacao најверојатно биле создадени од загревањето што делумно го стопило металот додека паѓал низ атмосферата.
