Судијата на синоќешниот натпревар од 7. коло во Калчото помеѓу Рома и Фрозиноне, Матео Маркети, доживеа мала незгода при крајот од натпреварот.
Маркети во 86. минута од натпреварот го фатија грчеви во двете нозе, по што натпреварот беше прекинат на кратко за да му се пружи потребната лекарска помош, а му помогна и играчот од средниот ред на римскиот клуб, штотуку влезениот во игра Хусем Ауар. Всушност, судијата доби грч кога случајно се судри токму со Ауар.
По враќањето на теренот, италијанскиот судија мирно го приведе натпреварот кој заврши 2:0 во корист на домашните.
Инаку, стрелци за „Волчицата“ беа Ромелу Лукаку во 21. минута и Лоренцо Пелегрини во 83. минута, а асистент на двата гола беше Пауло Дибала.
Рома моментално е само на 12. позиција на табелата со само 8 бодови по седум одиграни натпревари, додека Фрозиноне е 10-ти со бод повеќе од синоќешниот ривал.
Во следното коло, исто така последно пред новата репрезентативна пауза, римјаните ќе гостуваат кај Каљари на Сардинија, додека Фрозиноне на домашен терен ја пречекува Верона.
