Македонската одбојкарска репрезентација не успеа да освои први бодови во вториот натпревар откако со убедливи 3:0 загуби од Холандија.
Иако влегоа оптимистички и се очекуваше победа денеска над Холандија, сепак на крајот резултатот вели дека нашите репрезентативци запишаа полош пораз и од оној на стартот од кодомаќинот Финска.
Во првиот сет Холанѓаните водеа цело време, а на крајот го добија со 25:20.
Во вториот сет почнавме со водство кое веднаш го изгубивме, повторувајќи ги истите грешки како на дуелот со Финците. Иако кон средината на сетот игравме поен за поен, израмнувајќи после секое водство на противникот, а едно време и поведовме со 15:14, потоа загубивме здив и Холандија го доби сетот со 25:18 за водство од 2:0.
Третиот сет, кој се покажа и како последен, беше сличен на првиот. Холанѓаните цело време водеа за на крајот да го добијат со 25:22.
Во нашиот табор Никола Ѓорѓиев и Александар Љафтов беа најефикасни со по 11 поени.
Во нашата група денеска Турција ја победи Шпанија со 3:1, додека Финска и Русија својот натпревар од 2. коло го играат утре.
