Скопје, 25 ноември 2019 (МИА) – На вториот натпревар од Шампионатот на Македонија во Мотокрос 2019 одржан викендов на патеката Орман 2 крај Скопје учествуваа 26 натпреварувачи поделени во четири класи МХ85, МХ1, МХ2 и МХ.
Во првиот натпревар во класата МХ1 победник беше кросистот Гоце Томовски од МК Гого-Скопје. Во класата МХ2 победи Христијан Станковиќ од МК Ендуро Тим Водно од Скопје, во класа МХ најдобар беше Зоран Каранфиловски исто така од МК Ендуро Тим Водно, додека во класата МХ85 во која настапуваат најмладите натпреваувачи победи Антонио Дамјановски од МК Хамачи Екстрим од Штип.
Истите натпреварувачи ги потврдија пласманите и на вторите трки и со самото тоа беа прогласени за победници во генералното пласирање на овој натпревар.