САД ќе распоредат уште 7.000 војници во Европа, кои ќе бидат во Германија, како одговор на руската инвазија на Украина, објави Пентагон.
„Тие ќе се распоредат во Германија за да ги уверат сојузниците во НАТО, да ја одвратат руската агресија и да бидат подготвени да поддржат низа барања во регионот“, рече претставник на Пентагон.
Тој додаде дека се очекува тие да заминат „во наредните денови“.
НАТО ќе одржи самит на кој ќе се соберат лидерите на 30 сојузнички земји за да ги одредат следните чекори, рече Бајден. Меѓутоа тој нагласи дека американските сили „не одат во Европа за да се борат во Украина“, туку за да ги бранат и поддржат НАТО сојузниците во регионот.
– Дозволете ми да кажам уште еднаш: нашите сили не се – и нема – да бидат вклучени во конфликтот со Русија во Украина, потенцираше американскиот претседател.
Тој им рече на новинарите дека „нема планови“ да разговара со Путин. Тој не одговори зошто САД сега не го санкционираат директно Путин.