Предводникот на Мначестер Сити уверува дека денеска не е дојден по одмазда за минатогодишната елиминација, туку едноставно сака да го освои натпреварувањето.
„Многу пати сум доаѓал на овој стадион како играч и како тренер. Сум победувал и сум губел, не знам што ќе биде сега. Би сакал да знам, но не знам“, започна Пеп на официјалната прес-конференција.
Неговиот Манчестер Сити во последните две сезони доаѓа многу блиску до освојување, но никако да го зграпчи пехарот. Во сезоната 2020/2021 играше финале и загуби од Челси, додека лани во полуфиналето беше запрен токму од Реал Мадрид.
„За да ја освоите Лигата на шампионите, треба да го победите Реал Мадрид бидејќи тие се убедливо најдобриот тим во ова натпреварување. Неодамна ги гледав снимките од двата натпревара од минатата сезона и мислам дека бевме одлични во нив. Не победивме и затоа сме денеска повторно тука. Не сме тука за одмазда, туку за уште една шанса. Еден ден ќе освоиме. Оваа сезона дојдовме тука да го направиме тоа“, рече каталонскиот стратег, кој верува дека севкупниот победник од полуфиналето „ќе се решава во Манчестер“, односно во реваншот.
„Граѓаните“ во сезоната 2019/2020 го елиминираа токму Реал во осминафиналето, но потоа налетаа на расположениот Лион и доживеаја разочарување.
„Секоја сезона сакаме да ја освоиме Лигата на шампионите. Би мразел да имам тим кој ќе ја освои Лигата на шампионите, а потоа ќе заборави на тоа. Секогаш сакаме да бидеме во тесна конкуренција со Реал и Барселона. Јас сум голем фан на Барселона, која направи одлична работа за прв пат да ја освои Лигата на шампионите“, продолжи тренерот на Сити.
Натпреварот се игра вечерва од 21 часот на „Сантјаго Бернабеу“, а правдата ќе ја дели Артур Суарешп Диаш од Португалија. Директен пренос на територијата на Македонија ќе врши Arena Sport Premium 1.