Со предност од 3 бода и исто толку кола до крајот на сезоната во Премиер лигата, Манчестер Сити е на добар пат да ја одбрани титулата пред Ливерпул.
Откако Ливерпул во саботата киксна против Тотенхем играјќи 1:1, а Манчестер Сити синоќа го декласираше Њукасл со 5:0, разликата од еден бод порасна на три. Но, се чини дека огромното мнозинство на неутрални фудбалски фанови на Островот преферира „Црвените“ на харизматичниот Јирген Клоп да станат шампиони отколку „Граѓаните“ предводени од Жузеп Гуардиола.
„До пред една недела никој не веруваше дека ќе бидеме шампиони. Сите во оваа земја навиваат за Ливерпул, медиумите и сите останати“, се пожали Пеп говорејќи за beIN SPORTS.
„Се разбира дека Ливерпул има неверојатна историја во Европа. Не во Премиер лигата - таму освоија една титула во 30 години. Но, ситуацијата е таква каква што е, Мора да освоиме 9 бода, можеби и 6“, додаде каталонскиот стратег кој шеста сезона е на клупата на „Граѓаните“ и ја брка својата четврта премиерлигашка титула.
Финалниот поход кон титулата за Сити почнува в среда кога тимот ќе му гостува на Вулверхемптон Волвс. Потоа в недела игра дома со Барнли, тим кој грчевито со бори за опстанок.
„Сѐ зависи од тоа што ќе се случи во наредните два натпревара. Во среда ќе биде вистинско финале за нас. Нашата судбина е во наши раце, а тоа е многу важно“, смета тој.
Во случај Манчестер Сити и Ливерпул да завршат со ист број на бодови, според правилата на Премиер лигата ќе одлучува општата гол-разлика. Доколку таа е идентична, тогаш шампион ќе биде тимот кој има повеќе постигнати голови. Доколку и по овој критериум се исти, дури потоа ќе се гледа меѓусебниот дуел. Моментално Сити има подобра гол-разлика од +68 наспроти +64 на Ливерпул.
