Организаторите на последниот Грен слем турнир од сезоната, УС опен, уште еднаш повторија дека планираат да ги спроведат здравствените и безбедносни протоколи, па сѐ поизвесно е дека нема да учествува српскиот тенисер Новак Ѓоковиќ.
Имено, еден од протоколите на турнирот кој започнува на 29 август е дека секој што сака да патува во Соединетите Американски Држави мора да има доказ за вакцинација.
Во САД, да потсетиме, сѐ уште е на сила забраната за влез на невакцинирани лица.
„Во овој момент, од сите носители на билети нема да се бара да покажат доказ за вакцинација за да влезат на УС опен. Меѓутоа, ако сте странец, за да присуствувате на турнирот мора да бидете вакцинирани со прифатлива вакцина против коронавирус, за да патувате во САД (ова се однесува на оние кои не се американски државјани или имигранти)“, изјавија организаторите со порака дека строго ќе ги следат безбедносните мерки препорачани од државата и њујоршките власти.
Да потсетиме, титулата на УС опен ја брани Даниил Медведев, кој минатата година во финалето го победи токму Новак Ѓоковиќ.
Српскиот ас досега три пати го има освоено УС опен.