Кошаркарите на Лос Анџелес Лејкерс доживеаја пораз на домашен терен од Атланта Хокс со 94:99, но натпреварот го одбележа повредата на Леброн Џејмс кој мораше да го напушти паркетот.
По првите 12 минути Атланта имаше тесна предност од 25:28. На почетокот од втората четвртина најдобриот светски кошаркар, Леброн Џејмс, поради повреда на десниот глужд го напушти теренот, а повредата ја доби откако противничкиот играч Соломон Хил ненамерно, но крајно незгодно падна врз неговата нога.
Џејмс успеа да стане, дури и се врати на терен и погоди тројка, но за брзо излезе од игра и замина во соблекувалната по што веќе не се врати.
И без него шампионот се држеше, на полувреме водеше со 53:52, но потоа значително се почувствува отсуството на Леброн. Атланта едно време дојде и до двоцифрена предност, а до крајот го задржа водството и славеше со 5 поени разлика.
Најефикасен на паркетот беше гостинскиот играч Џон Колинс со 27 поени и 16 скокови, а после него беше Монтрез Харел од Лејкерс со 23 поени и 11 скокови. Италијанецот Данило Галинари заврши со 18 поени.
Ова беше 14-ти пораз за бранителот сезонава кој останува трет на Западот зад Јута Џез и Феникс Санс. Атланта е 4-та на Истокот.
Резултати:
Лос Анџелес Лејкерс - Атланта Хокс 94:99
Мемфис Гризлис - Голден Стејт Вориорс 111:103
Филадекфија 76ерс - Сакраменто Кингс 129:105
Милвоки Бакс - Сан Антонио Спарс 120:113
Лос Анџелес Клиперс - Шарлот Хорнетс 125:98
