Германските политичари утре ќе се состанат во Берлин за да ги изложат стратегиите за борба против петтиот бран на коронавирусот и омикрон варијантата.
Вицеканцеларот Роберт Хабек рече дека очекува мерките да бидат заострени.
„Сигурен сум дека клубовите ќе се затворат и дека ќе ги намалиме контактите во затворен простор и за вакцинираните“, рече Хабек за радиостаницата Deutschlandfunk.
Нови мерки
Премиерот на покраината Северна Рајна Вестфалија, Хендрик Вест ги предупреди Германците оваа година да не прават големи новогодишни забави.
„Построги мерки за приватни собири се опција“, рече Вуст за ARD.
Вест, кој ќе претседава со конференцијата, рече дека федералните и државните влади мора да направат планови за службите за итни случаи, односно полицијата, пожарникарите и така натаму, да можат да продолжат да работат без проблеми дури и кога бројот на инфекции е голем.
„Ќе мораме да разговараме за тоа како да ја одржиме нашата земја функционална кога повеќе луѓе се заразени или ставени во карантин“, рече тој.
Експлозивно ширење
Во својата прва изјава, германскиот експертски совет за коронавирус предупреди дека омикрон претставува закана и за целосно вакцинираните поединци, како и за оние кои прележале COVID-19.
„Ова може да доведе до експлозивно ширење“, се вели во извештајот, додавајќи дека се очекува на некои места болниците да бидат со целосно исполнети капацитети.
Сепак, министерот за здравство Карл Лаутербах категорично ја отфрли идејата за локдаун пред Божик.
Бухнер вели дека Германија има проблем со омикрон бидејќи бројот на вакцинирани не е доволно голем.
„Сепак, кампањата за бустер доза добро напредува меѓу вакцинираните“, рече тој.
Мало зголемување на стапката на инфекција
Според официјалните податоци објавени во понеделникот, најмалку 70,3 отсто од вкупното население на Германија сега се целосно вакцинирани.
Најмалку 26,2 милиони - вкупно 31,5 проценти - исто така примиле бустер доза.
Стапките на зараза во Германија благо се зголемија во понеделникот, по неколку недели пад на бројките.
Стапката на инциденца на инфекција од седум дена достигна 316, во споредба со 315,4 претходниот ден и 389,2 пред една недела.
Околу 116 лица починале од COVID-19 во последните 24 часа, соопштија здравствените власти.