Новак Ѓоковиќ се надева дека ќе игра на Австралија опен во јануари следната година, иако беше исфрлен од таа земја на почетокот на оваа година поради закана за здравјето и јавната благосостојба на населението, односно неговиот став за вакцинација против коронавирусот.
Во исто време му беше одземено правото за влез во Австралија во следните три години. Не е вакциниран, ниту има намера да биде, потврди по освојувањето на Вимблдон, но постои можност да го видиме следната година на првиот Грен слем турнир во сезоната.
„Како што сега стојат работите, не можам да одам во Австралија и Соединетите Американски Држави, но се надевам на добри вести. Верувам дека ситуацијата околу Австралија опен ќе се промени. Нема многу време за УС Опен, но надежта последна умира. Би сакал да играм во САД и Австралија, но ако не можам, тоа нема да биде крај на светот“, изјави Ѓоковиќ по пречекот во Белград.
Постои шанса работите да се свртат во корист на Ѓоковиќ. Според Daily Mail, на Ѓоковиќ би можел да му биде укината забраната што го спречува да дојде во Австралија. Доколку е така, Ѓоковиќ ќе добие шанса да атакува на десеттата титула таму и 22. Грен слем титула порано од очекуваното. Да потсетиме, исто толку има Рафаел Надал, кој моментално води во рангирањето. Роџер Федерер, кој одамна го немаше на терените, остана на 20 титули.
Што се однесува до Ѓоковиќ и Австралија, владата на новиот австралиски премиер Ентони Албанезе поинаку гледа на случајот на Ѓоковиќ во однос на претходниот. Самиот Албанезе е вљубеник во тенисот, игра неколку пати неделно, а не сака да го осиромаши турнирот со отсуството на еден од најдобрите на сите времиња.
Исто така, тој е во добри односи со Австралиската тениска асоцијација и има намера да влијае на одлуката според која Ѓоковиќ нема право на настап на Австралија опен, пишува Daily Mail. Таа одлука не е на Федерацијата, но пресврт e можен и очекуван.
