Денес во Москва беше погребан Михаил Горбачов, последниот советски претседател со што заврши една голема ера во историјата на политиката.
На испраќањето на Горбачов присуствуваа голем број граѓани кои се збогуваа од последниот советски лидер. Пријатели на Горбачов, како и негови роднини, седеа покрај ковчегот, а во близина се наоѓаа и војници од почесната гарда.
„Овде сум да му изразам почит на овој голем човек. Презеде товар кој никој од нас не можеше да го преземе и по тоа треба да го паметите, и покрај зборувањата на луѓето. Кој нема згрешено, кој не направил грешка? Треба да му простиме. Никогаш не ни требаше да го обвиниме за што било“, изјави Галина Иванченко.
Иако се очекуваше на погребот да присуствуваат и најважните луѓе во Русија, тоа не се случи. Рускиот претседател Владимир Путин и рускиот премиер Михаил Мишустин испратија венци во знак на сеќавање на Горбачов, а слично направија и претставници од регионот и државни компании.Во Домот на синдикати сепак присутен беше Дмитриј Медведев.
Уште порано се зборуваше дека Путин и Горбачов не биле во добри односи, особено не се сложувале кога станува збор за потегот на Путин во контекст на Украина. Всушност, луѓето блиски со Горбачов биле сведоци колку трауматизиран бил поранешниот советски лидер од настаните во Украина.
„Не само специјалната воена операција која почна на 24 февруари, туку целата еволуција на односите меѓу Русија и Украина во текот на изминатите години беа голем удар за Горбачов. Тоа го скрши емоционално и психички“, вели Павел Палашченко, кој 37 години работел со Горбачов.
„Во разговорите со него беше очигледно дека е шокиран и збунет од тоа што се случува. Веруваше не само во блискоста на рускиот и украинскиот народ, туку дека и тие два народа се измешани“, додаде Павел.