Мобилниот систем Starlink на SpaceX досега се покажа како „огромен успех, исполнување и надминување на целите на тестот“. Компанијата го наведува напредокот во тестирањето на својата технологија Starlink Direct-to-Cell, која користи сателити во орбитата за испраќање интернет податоци на мобилните телефони на земјата.
SpaceX претходно се огласи на социјалната мрежа X за да демонстрира некои од своите успешни тестови, кои неодамна вклучија испорачување брзина на преземање од 17 Mbps. Вработените во SpaceX ги тестираа можностите на технологијата во Редмонд во Вашингтон, Маунтин Вју во Калифорнија и Канзас Сити во Тексас.
„Помеѓу другите резултати, сателитите можеа да комуницираат со повеќе модели на немодифицирани уреди на Samsung, Apple и Google користејќи го спектарот PCS G Block на T-Mobile во урбани и рурални области, внатре и надвор, како и под ведро небо и под дрвја. Овие уреди комуницирале за време на минувањето на сателитот и не доживеале пречки“, според SpaceX.
Интересно е и како мобилната Starlink технологија ќе пренесува интернет податоци на мобилни телефони во затворен простор. Деталите сè уште не се достапни, но SpaceX ја тестираше сателитската технологија во рамките на максималната дозволена густина на моќност, или како што ја нарекува „количината на енергија што ја емитува предавателот, а која е присутна по единица површина“.
„Ова им овозможи на уредите да комуницираат со сателити дури и кога се под дрвја или во затворени простории (иако услугата Direct-to-Cell е дизајнирана за надворешна употреба) до агол на височина од 25 степени“, се додава.
Покрај објавувањето на X и испраќањето СМС пораки, мобилната технологија Starlink може да пренесува и пораки испратени преку WhatsApp.
Ривалските компании беа загрижени дека сателитите Starlink ќе предизвикаат радио пречки, но немаше такви во текот на двата месеца секојдневно тестирање.
Откако доби дозвола од властите, SpaceX планира да го лансира мобилниот систем Starlink за корисниците на мрежата T-Mobile некаде подоцна оваа година. Целта е првично да се овозможи испраќање текстуални пораки, додека поддршката за гласовни повици и податоци треба да пристигне следната година.
За лансирање на услугата, SpaceX планира да лансира повеќе од 800 сателити Direct-to-Cell во наредните месеци.
