Случајот на исчезнатата кинеска тенисерка Пенг Шуаи доби нов заплет откако China Global Television Network објави писмо во кое тенисерката вели дека е добро и дека одмора.
На 2 ноември Пенг на кинеската социјална мрежа Weibo објави писмо во кое тврди дека била сексуално нападната од кинески политичар, со знаење на неговата сопруга која чувала стража пред вратата.
„Немам аудио или видео докази и беше невозможно да ги направам, но го имам моето многу реално искуство“, напиша Пенг, чиј несакан однос со 40 години постариот политичар продолжил и во следниот период.
Објавата наскоро беше избришана, а тенисерката цензурирана на мрежата. Францускиот весник Le Mond неколку дена подоцна објави дека 35-годишната Пенг исчезнала, а извршниот директор на WTA Стив Сајмон вели дека со неа некое време никој не успеал да стапи во контакт.
Сега е објавено писмо во кое тенисерката тврди дека е добро и дека сите тврдења за силување се неточни. Оваа објава внесе уште поголем сомнеж во целата приказна.
„Во врска со неодамнешните вести на официјалната страница на WTA, содржината ниту сум ја потврдила ниту сум ја верифицирала, објавена е без моја согласност. Вестите од таа објава, меѓу кои и онаа со обвинувањето за силување, не се точни. Не исчезнав, на безбедно сум. Одморам дома, се е во ред. Ви благодарам за грижата.
Ако WTA објави уште вести за мене, ве молам да ги проверите со мене и не ги објавувајте без моја согласност. Како професионален тенисер, ви благодарам од срце. Се надевам дека и понатаму ќе го промовирам кинескиот тенис ако добијам прилика, се надевам ќе бидам се подобра.
Уште еднаш, ви благодарам на сите за грижата“, стои во писмото кое стигна до China Global Television Network , но и до Сајмон.
„Оваа објава само ја зголемува мојата загриженост за нејзината безбедност. Тешко ми е да поверувам дека Пенг Шуаи всушност напишала писмо или дека верува во тоа што пишува во него“, вели Сајмон.
Со него се сложува и кинеско здружение за одбрана на човечките права, кое истакнува дека кинеската влада повеќе пати ги има задржано луѓето кои предизвикале контроверзии, ја контролира нивната слобода и ги принудува да даваат изнудени изјави. Додека Пенг Шуаи не биде слободна, кинеската влада треба да докаже дека не е задржана против нејзина волја, велат од здружението, пишува Guardian.
Сајмон изјави дека кинеската влада го уверува дека тенисерката е на безбедно, но никој од WTA не успеал да стапи во контакт со неа.