Новинар на кинески државен медиум објави денеска нова, неавторизирана видеоснимка и фотографија со ликот на тенисерката Пенг Шуаи, чија судбина изминатите месеци сериозно ја загрижува тениската заедница по нејзините обвинувања за сексуално злоставување од страна на поранешен висок функционер на Комунистичката партија на Кина.
Новинарката на Global Times Ќингќинг Чен објави видео од седум секунди на Twitter во кое Шуаи разговара со поранешната кинеска кошаркарска ѕвезда Јао Минг. На снимката во друштво на Шуаи можат да се забележат и поранешниот пингпонгар Ванг Ликин и едриличарката Си Лиѓи.
Кинеската новинарка наводно ја добила снимката од нејзин пријател, а снимена е за време на натпревар во нордиско скијање во градот Шангај.
Поранешната најдобра светска тенисерка во двојки, Пенг Шуаи, на почетокот на ноември го обвини поранешниот заменик премиер Жанг Гаоли дека пред три години ја принудувал на сексуални односи.
Нејзината објава веднаш беше избришана од социјалните мрежи, а Шуаи следните три недели целосно исчезна од јавноста што предизвика загриженост во меѓународната заедница.
