Археолозите ископале болничка крипта од XVII век во Милано и откриле скелетни останки на 9 луѓе. Исто така ги пронашле и првите археолошки докази за психоактивни компоненти на канабис во човечки коски од модерното време.
Канабиноиди од канабис, како што е тетрахидроканабинол [THC], е едно од психоактивните својства поврзани со растението. Се складира во различни ткива во телото, вклучувајќи ги косата и коските.
Студијата од 2013 година објавена во списанието Drug and Alcohol Dependence покажа дека THC може да се открие во човечки коски „неколку недели“ по последната употреба на канабис. Сепак, науката напредуваше за краток период и нова студија објавена во Science Direct покажа дека психоактивните супстанции во коските може да се зачуваат со векови.
Точните механизми за тоа како канабиноидите се складираат во коските и колку долго тие остануваат забележливи варираат од личност до личност и се многу зависни од фреквенцијата на употреба, дозата и индивидуалниот метаболизам. Коските во суштина дејствуваат како резервоар за канабиноиди, а нивното откривање може да се користи во форензички и клинички услови за да се процени употребата на канабис во минатото.
„Молекулите на лековитите растенија може да се откријат со токсиколошка анализа дури и со векови по смртта на една личност“, изјави Гаја Џордано од Универзитетот во Милано за New Scientist.
Таквите молекули може да се заробат и складираат откако ќе се апсорбираат во крвотокот, а потоа да патуваат низ крвните садови во коскеното ткиво.
Истражувачкиот тим не бил во можност да идентификува никакво спомнување на канабис во болничките записи во Ка' Гранда, во кои се детализирани различните лековити соединенија што се користат како третмани. Д-р Џордано шпекулира дека луѓето „се самолекувале или користеле канабис рекреативно“, наместо да им се препишува растението како медицински третман.