Шкотската премиерка Никола Старџен изјави дека планира да одржи нов референдум за независност на Шкотска доколку победи на изборите закажани за мај 2021 година.
Во изјава за BBC, премиерката рече дека нејзината Шкотска национална партија подготви документ кој содржи 11 чекори што треба да се преземат пред самиот референдум.
„Сакаме да одржиме законски референдум и ќе побарам согласност од народот на Шкотска во мај. Ако ми дадат дозвола, имам намера да ја спроведам волјата на народот. Тоа е демократија. Не станува збор за тоа што сакам или што сака Борис Џонсон, туку за тоа што сакаат луѓето во оваа земја“, рече Старџен.
Спротивно на тоа, опозициските партии во Шкотска сметаат дека премиерката треба да реши многу поважни прашања во моментот, како што се борбата против коронавирусот и економското закрепнување.
Најважниот дел од документот што Шкотската национална партија го презентираше во јавноста, се однесува на одобрување од Обединетото Кралство и Џонсон за одржување референдум за ова прашање. Во членот 8 од документот се вели дека Шкотска повторно ќе побара одобрување од Борис Џонсон за активирање на законот што ќе ѝ овозможи на оваа земја да распише референдум.
Досега, оваа одлука секогаш ја носеше премиерот на Обединетото Кралство, што беше случај во 2014 година, кога премиерот Дејвид Камерон ги префрли овластувањата на Шкотска по прашањето за независност.
Овој пат, Борис Џонсон претходно објави дека нема да ги прифати новите барања на Шкотска за нов референдум и изјави дека Шкотите веќе се изјасниле по ова прашање.
„Британската влада ќе продолжи да ја почитува таа демократска волја на шкотскиот народ и затоа не може да го одобри трансферот на власта, што може да доведе до организација на нов референдум“, рече Џонсон.
Првиот референдум за независност на Шкотска, одржан во 2014 година, покажа дека 55 проценти од граѓаните сакаат да останат во Обединетото Кралство, додека 45 проценти од граѓаните гласаа за независност на Шкотска.
Барањата за нов референдум се појавија откако Велика Британија ја напушти Европската Унија, иако Шкотска беше против таквата одлука.