Одлуката на британската Влада да воведе 14-дневен карантин за сите кои ќе влезат во земјата од Шпанија „не е фер“, рече шпанскиот премиер.
Педро Санчес изјави дека туристите во повеќето шпански региони би биле посигурни од коронавирусот отколку во Велика Британија и додаде дека се надева оти земјата ќе го смени ставот.
Тој рече дека во тек се преговори, откако Велика Британија исто така ги советуваше своите граѓани да не патуваат во Шпанија освен во итен случај.
Но, британската влада рече дека не планира да ја смени својата одлука за карантинот, а официјалниот портпарол на Борис Џонсон предупреди дека „нема патување без ризик додека трае пандемијата“.
Санчес рече дека Велика Британија „направила грешка“ бидејќи ги зела предвид стапките на зараза за целата земја, а во сите региони во Шпанија стапките не се исти.
Тој додаде дека 64,5% од новите случаи се само на две територии и дека во поголемиот дел од Шпанија бројките на заразени со COVID-19 се многу пониски отколку во Велика Британија.
Британските туристи во Шпанија се шокирани и збунети од ненадејната одлука на нивната Влада која завчера одлучи да им биде одреден карантин од 14 дена откако ќе се вратат во земјата.
Британската Влада завчера ја тргна Шпанија од листата на земји каде е безбедно да се патува. Оваа мерка ќе нанесе огромен удар врз шпанскиот туризам кој се обидува да спаси дел од сезоната по големите загуби поради рестриктивните мерки воведени за спречување на ширењето на коронавирусот.
Шпанија е популарна дестинација за британските туристи. Само лани 18,08 милиони Британци летувале во оваа земја.
