Безбедносни истражувачи денеска соопштија дека шпионскиот софтвер „Пегаз“ на израелската компанија НСО е откриен на мобилните телефони на шест палестински активисти за заштита на човекови права, делумно поврзани со групи за кои израелскиот министер за одбрана Бени Ганц претходно тврдеше дека се вмешани во тероризам.
Ова е прв случај палестински активисти да се најдат како цел на воениот шпионски софтвер „Пегаз“, пренесе AP.
Неговата употреба против новинари, активисти за заштита на човекови права и политички дисиденти од Мексико до Саудиска Арабија е документирана уште од 2015 година.
Успешната „инфекција“ со „Пегаз“ потајно им дава пристап на хакерите на се што човекот чува и користи на својот телефон, вклучувајќи ја и комуникацијата во реално време.
Засега не се знае кој го поставил шпионскиот софтвер на телефоните на палестинските активисти, изјави истражувачот Мохамед ал Маскати од непрофитната организација Front Line Defenders.
Набргу по идентификувањето на првите два напади во средината на октомври, израелскиот министер Бени Ганц прогласи шест палестински групи за терористички организации.
Front Line Defenders, со седиште во Ирска, и најмалку две жртви велат дека го сметаат Израел за главен осомничен и веруваат дека именувањето е можеби темпирано за обид да се засени откривањето за хакирањето, иако не презентираа докази со кои би ги поткрепиле овие тврдења.