Американскиот суд ја осуди Ема Коронел Аиспуро, сопругата на мексиканскиот нарко бос Хоакин Ел Чапо Гузман, на три години затвор, откако се изјасни виновна за помагање на нарко картелот Синалоа.
Таа исто така призна дека му помогнала на Гузман да побегне од затворот во Мексико, пренесе BBC. Според судските документи, Ема заедно со Гузман и други членови на картелот Синалоа учествувале во трговија со кокаин, хероин, метамфетамин и марихуана во САД.
Пред да биде изречена пресудата пред федералниот суд во Вашингтон, Аиспуро (32) побара од американскиот окружен судија Рудолф Контрерас да покаже милост.
„Со сета должна почит, ви се обраќам денеска за да го изразам моето вистинско жалење за каква било штета што можеби сум ја направила, и ве замолувам вас и сите граѓани на оваа земја да ми простите“, рече таа.
Обвинителите бараа затворска казна од четири години.