Компанијата SpaceX ја лансираше ракетата Falcon 9 која во вселената го однесе сателитот IXPE (Imaging X-ray Polarimetry Explorer) на американската вселенска агенција НАСА.
Сателитот за првпат е најавен во 2017 година и е првиот кој може да ја мери поларизацијата на икс-зраците кои доаѓаат од космички извори како црни дупки и неутронски ѕвезди.
Се работи за сателит со големина на фрижидер кој има три телескопи за следење и мерење на насоки, енергија и поларизација на светлината. Кога податоците од сите три телескопи ќе се комбинираат, НАСА може да формира слики кои би ни дале подобар увид во тоа како функционираат мистериозните небесни тела кои емитуваат икс-зраци.
Набљудувањето црни дупки ќе им помогне на научниците да го прошират знаењето на човештвото за одредени области во вселената кои ни се помалку познати.
