Шампионот Струга денеска го претстави најновото засилување, поранешниот репрезентативец Стефан Спировски.
Откако минатата недела се засили со Кире Ристевски, искусниот бек со 59 настапи за македонската репрезентација, кој беше дел и од ЕУРО 2020, денеска Струга се пофали со уште едно засилување од истиот калибар. Интересно, и двајцата доаѓаат од редовите на кипарски Етникос, а се и генерација, родени 1990 година.
Стефан Спировски беше дел од истата репрезентативна генерација како Ристевски и запиша 55 настапи со 1 постигнат гол, а играше и на ЕУРО 2020. Тој со Струга потпиша 2-годишпен договор и ќе го носи дресот со бројот 6.
„Неговото големо искуство во европските натпреварувања сигурно ќе биде добредојдено за нашиот тим, особено во последната линија од средниот ред, каде најдобро се снаоѓа, иако може да игра и како централен играч за врска“, велат од шампионот.
Спировски во текот на својата богата кариера, која ја почна во Пелистер од родната Битола, играше за Борац во Србија, Берое во Бугарија, Ференцварош и МТК во Унгарија, Хапоел Тел-Авив во Израел, АЕК во Кипар, Мариупол во Украина и Пјуник во Ерменија. Во Македонија беше дел од Работнички и Вардар.
Покрај Спировски и Ристевски, Струга летово се засили и со десниот бек Бојан Илиевски од Македонија ЃП, играчот од дефанзивната средина Стефан Јевтоски од унгарски Ујпешт, левото крило Арби Воша од Шкупи и јапонскиот вингер Масааки Такахара од Гостивар.
Струга на 10 јули го има првиот натпревар од квалификациите за пласман во Лигата на шампионите кога му гостува на словачкиот шампион Слован. Реваншот е по една недела, на 17-ти. Во случај на елиминација ќе продолжи во квалификациите за Конференциската лига.
