Доналд Трамп нема претседателски имунитет и може да биде кривично гонет под обвинение за заговор за поништување на изборите во 2020 година, одлучи судот во Вашингтон.
Трамп во историскиот правен случај тврдеше дека е имун од кривични пријави. Меѓутоа, пресудата го отфрли наведеното барање.
Тоа е неуспех за Трамп, кој со години се повикува на претседателскиот имунитет додека се соочува со обвиненија во повеќе случаи. Се очекува поранешниот претседател да поднесе жалба на пресудата, што значи дека случајот на крајот може да оди до Врховниот суд, каде конзервативците имаат мнозинство од 6-3, пишува BBC.
Американскиот специјален обвинител Џек Смит го обвини Трамп (77) за заговор да ја отфрли победата на Џо Бајден на изборите во 2020 година и за измама за да остане на функцијата. Судењето за тој случај првично беше закажано за 4 март, но беше одложено во очекување на одлуката за барањето за имунитет.
Може да има уште едно одложување доколку случајот заврши пред Врховниот суд. Претходно овој месец, комисија од судии го разгледуваше случајот во Окружниот апелационен суд во Вашингтон. Аргументот на адвокатот на Трамп се засноваше на идејата дека претседател кој не бил отповикан од Конгресот не може да биде предмет на кривична постапка.
Тие истакнаа дека Трамп бил отповикан од Претставничкиот дом, но Сенатот не ја потврди споменатата одлука. Судиите, сепак, звучеа скептични. Судијката Флоренс Пан сугерираше дека, со имунитет, претседателот може да продава државни тајни или да нареди атентат на политички ривал без страв од кривично гонење.
