Циркулацијата на делта варијантата на коронавирус во области со ниска вакцинација го поттикнува ширењето на COVID-19 низ целиот свет, соопштија денеска претставници на Светската здравствена организација.
– Во многу места во светот каде што има сè повеќе заразени со делта варијантата на коронавирус, дури и во земји кои имаат високо ниво на вакцинација на национално ниво, делта сојот навистина циркулира и се шири во области со мала покриеност со вакцини. Постои многу ограничена и неконзистентна имплементација на јавните здравствени и социјални мерки, изјави епидемиологот на СЗО, Марија Ван Керхове на онлајн прес-конференција.
Според главниот научник на СЗО, Сума Сваминатан, „вакцините без сомнение спречуваат зголемување на бројот на тешки и смртни случаи како последица на делта варијантата на коронавирусот“.
Таа рече дека податоците во моментов не упатуваат дека е неопходна трета доза против COVID-19.
СЗО смета дека најранливите луѓе насекаде во светот треба прво целосно да се вакцинираат, а дури потоа во богатите земји треба да се започне со трета доза на вакцинација.
