Од Островот стигнуваат информации дека Тотенхем и Баерн конечно постигнале договор за трансфер на голгетерот Хари Кејн, па сега останува само играчот да ги договори условите.
Откако Тотенхем ја одби понудата вредна 100 милиони, сега се договориле за сума малку поголема од таа, иако засега никој нема информација колку точно ќе треба Баерн да искешира.
Сега останува Хари Кејн да одлучи дали конечно ќе си замине од Лондон, знаејќи дека тој во неколку наврати изјавуваше желба да остане и да го брка рекордот на Алан Ширер за најдобар стрелец во историјата на Премиер лигата.
Кејн е во Тотенхем уште од дете и сениорски фудбал за други екипи има играно само како позајмуван во тинејџерските години. Сепак, и покрај долгото време во Тотренхем, нема освоено ниту еден единствен пехар, дури ниту некој малку важен куп.
Многумина во Англија сметаат дека Кејн сепак нема да ја прифати понудата на тимот од Баварија.
Со тоа не се согласува новинарката Мелиса Реди од Sky Sports, која вели дека Баерн не би вложувал толкав напор да се договори со Тотенхем доколку не би имал гаранција од самиот играч дека ќе дојде во Минхен.
Кејн кон крајот на јули го прослави својот јубилеен 30-ти роденден. Во Премиер лигата има постигнато 213 голови на 320 натпревари, со што е на 2. место на вечната листа зад легендата Алан Ширер кој има 260 голови. За да ја надокнади разликата од 47 голови, Кејн би требал уште барем две сезони да игра во Англија.
Токму тоа е дилемата на англискиот репрезентативец, но во полза на заминување е фактот што тимот очигледно не е кадарен да освојува пехари, а со останување би ризикувал да не освои ништо во кариерата, на страна индивидуалните награди за најдобар стрелец.
Кон крајот на јуни во англиските медиуми излезе информацијата дека Кејн веќе ги има договорено личните услови со Баерн и чека само двата клуба да се договорат за трансферот, нешто што денеска конечно се случи.
Неодамна англиската легенда Гари Линекер го советуваше Кејн да се пресели во Баерн велејќи му дека „фудбалот се игра за тимски трофеи, а не за индивидуални“. За разлика од Тотенхем, Баерн речиси секоја година освојува пехари.
