Европската куќа на фудбалот денеска потврди дека Италија и Турција ќе бидат домаќини на Европското првенство во 2032 година, а Англија, Велс, Шкотска, Северна Ирска и Ирска го добија ЕУРО 2028.
Двете земји првично имаа поднесено индивидуални кандидатури, но откако стана јасно дека фаворит за ЕУРО 2028 е кандидатурата на Британските Острови, одлучија да се насочат кон ЕУРО 2032 и тоа заедно, со што практично останаа единствени кандидати и УЕФА имаше лесен избор.
УЕФА објави дека двата домаќина презентирале 20 стадиони како потенцијални места на одигрување на натпреварите, но им рекла да одберат 10, по 5 во секоја земја. Стадионите треба да бидат избрани до октомври 2026 година.
„Италија нема организирано важен фудбалски турнир од Италија '90. По 42 години, вистинско време е да ги фокусираме нашите напори и да докажеме дека Италија може да организира“, вели Габриеле Гравина, претседателот на Фудбалската федерација на Италија (ФИГЦ).
Десетте стадиони кои Италија ги има предложено, а од кои ќе треба да одбере 5, се:
„Џузепе Меаца“ - Милано
„Алианц“ - Торино
„Маркантонио Бентегоди“ - Верона
„Луиџи Ферарис“ - Џенова
„Ренато Дал'Ара“ - Болоња
„Артемио Франки“ - Фиренца
„Олимпико“ - Рим
„Диего Армандо Марадона“ - Неапол
„Сан Никола“ - Бари
„Унипол Домус“ - Каљари
Стадионите во Верона, Џенова, Болоња, Фиренца, Неапол и Бари треба да бидат реновирани.
Турција во својата кандидатура ги имаше предложено следниве 10 стадиони, од кои сите се готови и не е планирана додатна интервенција:
„Ататурк“ - Истанбул
„Рамс Парк“ - Истанбул
„Улкер“ - Истанбул
„19 Мај'с“ - Анкара
„Суташ Тимсах Парк“ - Бурса
„Медаш Коња Бујукшехир“ - Коња
„Шенол Ѓунеш“ - Трабзон
„Корендон Ерлајнс“ - Анталија
„Ататурк“ - Ескишехир
„Калјон“ - Газиантеп.
И на ЕУРО 2028 и на 2032 ќе учествуваат 24 репрезентации, со истиот формат на натпреварување кој почна од ЕУРО 2016.
Досегашни домаќини на Европските првенства:
1960: Франција
1964: Шпанија
1968: Италија
1972: Белгија
1976: Југославија
1980: Италија
1984: Франција
1988: Западна Германија
1992: Шведска
1996: Англија
2000: Белгија и Холандија
2004: Португалија
2008: Австрија и Швајцарија
2012: Полска и Украина
2016: Франција
2020: Пан-европско (Азербејџан, Англија, Данска, Германија, Италија, Романија, Русија, Унгарија, Холандија, Шкотска и Шпанија)
2024: Германија
2028: Англија, Велс, Шкотска, Северна Ирска и Ирска
2032: Италија и Турција