Ентони Џошуа по втор пат беше поразен од Олександр Усик во борбата за шампион во тешка категорија. По завршувањето на борбата, Џошуа се однесуваше како да доживеал нервен слом па зеде два појаси на Усик и ги фрли надвор од рингот.
Му пријде на Украинецот и му рече:
„Ти воопшто не си силен, како ме победи? Како? Со вештина!“
Усик за тоа време неуспешно се обидуваше да му одговори. Џошуа беше прв кој го зеде микрофонот по борбата. Почна да раскажува за неговиот живот и како требало да заврши во затвор. Својот монолог го оправда тврдејќи дека мора да се знае неговата приказна за да се разбере неговата страст.
Потоа му пријде на Усик, го прегрна и побара аплауз за Украинецот.
„Овој тип мене да ме победи. Можев да бидам подобар, но тоа само покажува колку напорно мора да работите“, рече тој.
Потоа повторно поведе овации за Усик, па проговори за војната во Украина. Истакна дека им се восхитува на сите спортисти од оваа земја па уште еднаш побара аплауз за Усик.
„Под вакви околности успеа да остане шампион“, рече тој.
По инцидентите, следеа извинувања од пријателите на Џошуа поради неговото необјасниво однесување. При излегувањето од рингот, Британецот се расправаше и со луѓе од публиката.
