Европскиот шампион Вардар ќе ја брани титулата во Лигата на шампионите и сезоната 2017/2018 ќе ја започне во А групата која според имињата на останатите екипи е нешто полесна од Б групата.
Вардар, кој не беше носител на ждрепката во Љубљана, ќе игра против Барселона, Рајн Некар Левен, ППД Загреб, Висла Плок, Кристијанштад и Нант.
Во тимот на Нант од наредната сезона ќе настапува капитенот на македонската репрезентација Кире Лазаров, додека дресот на Рајн Некар Левен го носи Филип Талевски, во Барселона еден од голманите е Борко Ристовски.
Металург кој со вајлд кард ќе учествува во лигата на жрепката во Љубљана беше носител во делот каде беа тимовите кои ќе се натпреваруваат во Ц и Д групите.
Македонскиот вицеправак за противници ги доби украинскиот Мотор Запорожје, францускиот Монпелје, турскиот Бешикташ, Чеховски Медведи од Русија и победникот од квалификациската група во која се Спортинг, Татран Прешов, Аплпла и Кокс.
Натпреварите во Лигата на шампионите ќе стартуваат на 13 септември.