Уште еден неуспех на Рома сериозно ќе ја загрозеше иднината на Жозе Мурињо на клупата на „Волчицата“, но триумфот од 2:0 над Фрозиноне донекаде го маскира екстремно лошиот старт на сезоната.
Со головите на Ромелу Лукаку и Лоренцо Пелегрини, тимот од „Олимпико“ по седум кола го освои само осмиот бод и моментално се наоѓа на 12-тото место на табелата во Серија А.
„Минатата недела реков дека не треба да се грижите и дека овој тим на Рома ќе почне да победува. Успеавме да победиме многу квалитетен тим за кој имав високо мислење додека го подготвував натпреварот на нашиот стадион, а го имам и сега по нашата победа од 2:0. Тоа е одличен тим, што ја прави нашата победа уште позначајна“, изјави португалскиот стручњак по натпреварот, не штедејќи зборови да го пофали Фрозиноне кој беше во серија од 5 натпревари без пораз, а единствениот пред синоќешниот го претрпе во воведното коло кога со 3:1 загуби од актуелниот шампион Наполи.
Мурињо посебно истакна дека му е драго што и покрај лошите игри и резултати, навивачите никогаш не се свртеа против тимот.
„Тоа е посебна сила на Рома. Навивачите се со нас, нѐ поддржуваат и нѐ критикуваат, а имаа причина за тоа по лошиот старт. За среќа, успеавме да победиме и сега сите заедно сме добро расположени. Исто така, важно е што Лукаку ја затресе мрежата и што докажува колку ни е важен. Знаете, тој даваше голови во Интер и Манчестер Јунајтед, па бидете сигурни дека истото ќе го прави и овде“, рече Мурињо и заврши порачувајќи:
„На добар пат сме и сѐ ќе биде добро“.
