Во Виена, каде се наоѓа седиштето на Европската ракометна федерација, денеска беа извлечени полуфиналните двојки за завршниот турнир во Лигата на шампионите, кој на 28 и 29. мај ќе се одржи во Келн.
Унгарскиот шампион Веспрем, кој во четврфиналето го елиминираше Вардар, за противник го доби Кил, кој на патот до завршниот турнир беше подобар од сé уште актуелниот европски првак Барселона.
Веспрем и Кил, во тековната сезона, натпреварите во Лигата на шампионите ги започнаа во А групата, во која унгарскиот тим заврши на втората, а германскиот на четвртата позиција.
Во групата екипите беа успешни на домашен терен, Веспрем како домаќин славеше 29:27, а во Кил загуби 24:25.
Втората полуфинална двојка ја формираа полски Кјелце, екипа која третпат, во последните четири години, ќе игра на завршниот турнир и најбогатиот европски клуб, ПСЖ, кој е единствениот дебитант на Фајнал Фоур турнирот.
