Веројатно главниот виновник што Италија ќе пропушти втор Мундијал по ред, а и што воопшто играше во бараж наместо да се пласира директно, е Жоржињо, поради неговите два промашени пенали во квалификациите.
Жоржињо, познат како мајсторот за пенали на Челси, промаши два пенала во квалификациите за Италија и тоа двата против Швајцарија, која на крајот заврши прва во групата и обезбеди виза за Катар. И двата пенала беа за победа, едниот на гости, а другиот дома (двата натпревара завршија нерешено - 0:0 и 1:1). На крајот токму поради тие промашувања на Жоржињо Италија се најде во баражот, а таму сите знаеме што се случи синоќа.
„Боли кога ќе помислам бидејќи сѐ уште мислам на нив и ќе ме прогонуваат до крајот на животот“, признава Жоржињо за RAI Sport
Во 53. минута од дуелот во Базел во септември Јан Зомер го прочита Жоржињо и го одбрани неговиот удар.
„Да се обидеш двапати и да не му помогнеш на твојот тим и на твојата држава е нешто што ќе ме следи засекогаш, ќе ми биде товар“, додава.
Потоа во претпоследното коло во ноември во Рим повторно Зомер му фати пенал на Жоржињо во 90-тата минута, овој пат решавачки за првото место во групата.
Италија синоќа доживеа изненадувачка елиминација од Македонија со гол примен во втората минута од надополнувањето, а Жоржињо и дружината не можеа да го најдат патот до македонската мрежа.
„Луѓето велат дека треба да ги исправиме главите и да продолжиме понатаму, но тешко е“.
„Тешко е да се објасни што се случи. Многу боли. Да бидам искрен, уште не ми се верува. Не мислам дека не бевме креативни, доминиравме како и секогаш и создадовме многу шанси. Нажалост не бевме кадарни да ги завршиме. Игравме добар фудбал, го освоивме Европското првенство минатото лето, но за жал на последните неколку натпревари направивме мали грешки и потоа не можевме да се издигнеме. Тие ја направија разликата“, заклучи Италијанецот роден во Бразил.
