По прегласувањето на избирачко место во Општина Желино, кое е во рамки на изборната единица 6, според претставникот на ВРЕДИ, Башким Хасани, коалицијата ВРЕДИ добила близу 500 гласа, а за Европскиот фронт гласале 48 избирачи.
„Коалицијата ВРЕДИ доби еден пратеник повеќе за сметка на пратеник на Европскиот фронт со прегласувањето во шестата изборна единица“, изјави Хасани.
„Кога се гласа без притисоци, без кражби и без многу манипулации резултатот е тој, или во случајов, коалицијата ВРЕДИ го добива 14-тиот пратеник“, рече претставникот на коалицијата ВРЕДИ.
Според податоците на Државната изборна комисија (ДИК) за излезеноста на седумте избирачки места на кои денеска имаше прегласување за парламентарните избори, на избирачкото место во Општина Желино, едиствено на кое се прегласува во шестата изборна единица, до 18:30 часот гласале вкупно 546 избирачи.
Претставниците на коалицијата ВРЕДИ, Арбен Таравари и Башким Хасани, на социјалните мрежи го напишаа бројот 14 со што алудираат на уште еден пратеник во коалицијата.
Коалицијата ВРЕДИ на парламентарните избори на 8 мај имаше 13 пратеници, а коалицијата Европски фронт предводена од ДУИ доби 19 пратенички мандати.
