Лука Модриќ три дена пред својот 37. роденден одигра уште еден феноменален натпревар.
Реал Мадрид победи на гостувањето кај Селтик со 3:0 во првото коло од Лигата на шампионите, а Модриќ го постигна вториот гол во негов препознатлив стил – со „надворешна“. На десет минути пред крајот, кога резултатот беше оној со кој заврши натпреварот, Карло Анчелоти му сигнализираше на Модриќ да ја напушти играта за да биде заменет со Асенсио.
Кога навивачите на Селтик видоа дека велемајсторот си заминува, целиот стадион, 60.000 луѓе, стана и со овации и скандирања долго му аплаудираа на Модриќ. Тој возврати со гест на благодарност и аплауз кон сите четири трибини. Ваквата почит кон Модриќ е особено значајна на ова место поради две причини.
Селтик Парк е храм на шкотскиот и светскиот фудбал, стадион кој ги видел најголемите фудбалери во историјата. Покрај тоа, позната е по фантастичната атмосфера и постојаното навивање, но за домаќините. Таму гостите секогаш ги чека пекол. И покрај ова, навивачите на Селтик буквално станаа и му се поклонија на својот ривал иако тој ги победи.
Многу љубители на фудбалот забележаа дека ова е петти пат во исто толку натпревари оваа сезона Модриќ да добива овации, од кои четири пати ја доби оваа чест на гостувањата: Алмерија, Селта, Еспањол и Селтик.
