Карло Анчелоти изјави дека е изненаден што во изборот мадридскиот клуб не беше прогласен за најдобар тим за минатата сезона, пренесуваат шпанските медиуми.
Голгетерот на Реал, Карим Бензема, на церемонијата во Париз ја доби Златната топка за најдобар фудбалер во минатата сезона. Во топ 10 најдобри фудбалери се најдоа уште тројца играчи на Реал и тоа Тибо Куртоа, Винисиус Жуниор и Лука Модриќ, но за најдобар клуб беше прогласен Манчестер Сити, иако минатата сезона Реал беше тој кој ја освои Лигата на шампионите, а го освои и шпанското првенство.
Згора на тоа, Реал на Анчелоти на патот до финалето го елиминираше токму Сити и тоа во полуфиналето.
„Горд сум на успехот на моите играчи. Се радувам што Карим ја доби Златната топка. Горд сум и поради добриот пласман на Куртоа, Модриќ и Винисиус. Во овој клуб постои сѐ што е потребно за успех: историја, компетитивност, квалитет на играчите и атмосфера“, изјави тој.
Италијанскиот стратег истакна дека не му се јасни одредени критериуми за гласањето во изборот на Златната топка.
„Не го разбирам критериумот за гласање на клупско ниво. Мислам дека не ја дава реалната слика за екипите, бидејќи јасно е дека најдобар беше Реал, кој ја освои Лигата на шампиони. Исклучително ги почитувам доделените награди, но ние на клупско ниво најголемата ја добивме во мај. Ме чуди тоа што во топ 30 не се најдоа некои наши фудбалерри. Тони Крос, Едер Милитау, Федерико Влаверде или Дејвид Алаба. Некој ќе рече дека сум пристрасен и дека се наоѓам во судир на интереси... Да, можеби и сум“, заврши Анчелоти.
