Фудбалерите на Манчестер Сити и Интер синоќа забележаа рутински победи над Баерн и Бенфика во првите натпревари од четвртфиналето на Лигата на шампионите.
Томас Тухел иомаше неславно враќање на Островот каде Манчестер Сити го победи Баерн со 3:0 на „Итихад“ и веќе со едната нога е во полуфиналето.
Посебно впечатлив беше првиот гол што го постигна Родри во 27. минута, а другите два беа дело на Бернарду Силва во 70-тата и на Ерлинг Холанд во 76. минута.
Интер славеше во Лисабон на „да Луж“ против Бенфика со 2:0 и дојде до голема предност во пресрет на реваншот во Милано.
Головите за „Нераѕурите“ ги постигнаа Николò Барела во 51. минута по нафрлувањето на Алесандро Бастони и Ромелу Лукаку од пенал во 82. минута откако ВАР го улови домашниот капитен Жуау Мариу како нафрлувањето на Дензел Думфрис го блокира со рака.
Домашните пропуштија неколку одлични прилики за гол и не треба да бидат однапред отпишани.
Реваншите се играат на 19 април на „Алианц Арена“ во Минхен и на „Џузепе Меаца“ во Милано.
Вечерва од 21 часот се играат преостанатите два четвртфинални дуели во кои на „Сантјаго Бернабеу“ Реал Мадрид го пречекува Челси, додека на „Џузепе Меаца“ во италијанска класика Милан ќе го нагости Наполи.