Дани Алвес се врати во Барселона, од каде во 2016 година замина во Јувентус.
38-годишниот бразилски десен бек играше за Јувентус, ПСЖ и Саун Пауло, а се врати како слободен играч откако го раскина договорот со бразилскиот клуб. Тој ќе биде на „Камп Ноу“ до крајот на сезоната.
„Можеби имам помалку коса од минатиот пат, но желбата е иста. Ќе се борам за место во тимот. Јас сум еден од вас и дојдов да ѝ помогнам на Барса да биде подобра“, изјави Бразилецот на претставувањето.
Иако се пишуваше дека Дани ќе игра за едно евро неделно, каталонското радио RAC1 објави дека Бразилецот е пријавен за најниската плата што ја дозволува Ла Лига, а тоа е 300.000 евра по сезона. Но, Барселона наводно вградила бизарна отштетна клаузула од дури 100 милиони евра во договорот на Бразилецот, иако тој има договор само до лето.
RAC1 објави дека Барселона нема ништо против да го продолжи неговиот договор на крајот на сезоната доколку Дани се покаже како добар потег.