Фудбалерите на Галатасарај го победија Истанбулспор со резултат 1:0, а натпреварот го одбележа неверојатното промашување од пенал на Мауро Икарди во 37. минута од натпреварот.
Во 36. минута беше досуден пенал за Галатасарај за прекршок над Икарди. Неговиот соиграч Керем Актуркоглу потоа ја зеде топката и изгледаше дека ќе шутира, а потоа настана шок кај сите присутни, но и кај гледачите крај ТВ екраните.
Актуркоглу му ја остави повратната топка на Икарди, а иако голманот веќе беше паднат, Аргентинецот шутираше далеку. Икарди ја стегна главата во неверување, но се искупи само пет минути подоцна кога постигна гол за победа на Галатасарај.
На овој начин фудбалерите на Галатасарај не успеаја да го копираат пеналот кој успешно го изведоа Лионел Меси и Луис Суарез на мечот Барселона - Селта на 14 февруари 2016 година, кога Меси му асистираше на Уругваецот од пенал за конечни 4:1.
Инаку, прв на ваков начин изведе пенал славниот Јохан Кројф.
Во декември 1982 година, на мечот меѓу Ајакс и Хелмонд Спорт, Холанѓанецот требаше да изведе пенал кога ја допре топката лево и му ја додаде на Јеспер Олсен кој на крајот му ја врати топката на Кројф во празна мрежа. Потег без преседан кој влезе во фудбалската историја и беше копиран во иднина.
