Цените на нафтата вчера се лизнаа под 82 долари на меѓународните пазари, бидејќи трговците стравуваат од продлабочување на кризата во кинескиот сектор на недвижности и слабеење на побарувачката за нафта во најголемиот светски потрошувач.
На лондонскиот пазар по пладне цената на барелот за испорака во март беше за 52 центи пониска од вчерашното затворање на трговијата и изнесуваше 81,88 долари. Вчера ја затвори трговијата со загуба од 1,15 долари. Во Лондон денеска поактивно се тргуваа со барели за испорака во април, по цена за 50 центи пониска, на 81,33 долари.
На американскиот пазар цената на барелот се намали за 29 центи, на 76,49 долари. Вчера го заврши тргувањето со загуба од 1,23 долари.
На почетокот на неделата пазарите ги потресе одлуката на судот во Хонгконг да го ликвидира презадолжениот кинески гигант за недвижности Evergrande. Дури и по повторените наредби, компанијата не доставила план за реструктуирање на долгот, образложи судијката Линда Чан.
Секторот на недвижности го кочи економскиот раст на Кина, со оглед на уделот од 25 отсто во БДП, па инвеститорите стравуваат од побарувачката на енергетски производи.
„Очекуваните последици од можниот колапс во кинескиот сектор на недвижности ги поништуваат сите владини стимулации и ќе предизвикаат многу негативни глобални шокови“, рече аналитичарот на PVM Џон Еванс.
Позначителен пад на цените беше запрен со ескалацијата на конфликтот на Блискиот Исток.
САД најавија дека ќе направат „сè што е потребно“ за да ги заштитат своите трупи по нападот со беспилотно летало во Јордан кога загинаа тројца американски војници и рани 40 други.
Американскиот претседател Џо Бајден го впери прстот кон „групите поврзани со Иран“, поттикнувајќи ги стравувањата од конфронтација со Техеран.
„Ескалацијата на тензиите меѓу САД и Иран, особено преку директен конфликт, би го зголемила ризикот од негативни последици за иранските нафтени резерви. Иранскиот извоз на нафта е веројатно најранливиот на можното построго спроведување на санкциите“, објаснува Вивек Дар од Commonwealth Bank of Australia.
Иран извезувал 1,2 до 1,6 милиони барели нафта дневно во поголемиот дел од 2023 година, што е еквивалентно на 1,0 до 1,5 отсто од глобалното снабдување со нафта, додаде Дар.
„Проценуваме дека денешната цена на барелот на лондонскиот пазар од 82 долари е само околу четири долари повисока од пазарната вредност, а два долари (од таа сума) се должат на повисоките транспортни трошоци“, напиша денеска JP Morgan. Остатокот е составен од премијата за геополитички ризик, додаваат тие.
Организацијата на земјите извознички на нафта (ОПЕК) одделно објави дека барел нафтена кошница на нејзините членки во понеделникот поскапе за 1,19 долари на 84,19 долари.