Лука Модриќ има договор со Реал до крајот на сезоната и сè уште не е познато дали ќе го продолжи.
Капитенот на хрватската репрезентација сака да ја заврши кариерата во Мадрид, но Реал го одложува продолжувањето на договорот со 37-годишниот играч за врска.
Дел од навивачите сметаат дека Модриќ е во пад на формата и дека не заслужува да остане уште една сезона во Реал. Така мисли и легендарниот играч на Реал Гути, кој одигра повеќе од 500 натпревари за Реал и кој кариерата ја заврши во 2011 година во турски Бешикташ.
„Се сомневам дека Модриќ ќе остане... Тој нема да има поголема улога следната сезона и не му треба на Реал. Не знам дали ќе дојде Џуд Белингам или некој друг играч од средниот ред, но Модриќ во одреден момент ќе мора да си замине“, изјави Шпанецот Гути и додаде дека Реал ќе го продолжи договорот со Карим Бензема, напаѓач кој исто така има договор до крајот на сезоната.
Модриќ оваа сезона одигра 22 натпревари за Реал и постигна пет гола со две асистенции. Во Реал е од 2012 година, а мадридски AS вчера објави дека минутажата на Модриќ ќе биде намалена бидејќи не е во форма и тренерот Карло Анчелоти сака да ја темпира формата за клучниот дел од сезоната.