Европската комисија (ЕК) соопшти дека ги казнува „Sony“, „Panasonic“ и „Sanyo“ за ценовен картел при литиум-јонските батерии за лаптопи и мобилни телефони.
Сумата за трите компании е 166 милиони евра, бидејќи ги прекршиле антикартелните одредби заедно со „Samsung SDI“. Samsung SDI не е казнета, бидејќи навремено ги известила властите за случајот.
„Милиони Европејци користат лаптопи, мобилни телефони и други уреди кои работат со литиум-јонски батерии. Денешната одлука ги санкционира четирите производители на батериите, чија слога влијаеше врз цените на голем број производи што се продаваат на европските потрошувачи. Одлуката исто така испраќа важен сигнал до компаниите – ако европските потрошувачи се погодени од картел, Комисијата ќе го истражува случајот, дури и ако контактите со цел картел биле реализирани надвор од Европа“, изјави еврокомесарот за прашањата на конкуренцијата Маргрете Вестагер.
Со истрагата на ЕК е докажано дека претставниците на компаниите во текот на четири години се сретнале во неколку наврати, најчесто во Азија, за да планираат начини за да ја избегнат конкуренцијата на пазарот на литиум-јонски батерии.