Бранителот на златниот медал од Пјонгчанг не успеа да го одбрани медалот откако финските хокеари предводени од Валтери Филпула беа подобри на мразот во Пекинг славејќи со 2:1.
И без дел од најдобрите хокеари поради тоа што не добија дозвола да отсуствуваат од НХЛ, Олимпијадата сепак виде добар хокеј. На крајот прогнозите се остварија, во финалето се сретнаа Финска и Русија. Русите важеа за благи фаворити, но на мразот во Пекинг сепак поуспешни беа Финците.
Русија прва дојде во водство и тоа во 8. минута од првата третина користејќи ја предноста од играч повеќе откако Бјорнинен доби 2 минути исклучување. Михаил Григоренко беше стрелец на голот на асистенција на Гусев и Нестеров.
Се играше 4. минута во втората третина кога Финците се вратија во игра благодарение на Виле Пока на чиј гол кумуваа Охтамаа и Бјорнинен.
До победничкиот погодок Финска дојде во 31. секунда од третата третина кога акцијата на Антила и Охтамаа в гол ја заврши Ханес Бјорнинен, инаку играч на фински Јокерит кој настапува во руската КХЛ, втората најдобра лига на светот после НХЛ.
До крајот Русите не успеаја да го најдот патот до финската мрежа и да се изборат барем за продолженија, па Финска дојде до победата и златниот медал, прв пат во својата олимписка историја откако двапати претходно губеше во финале. Финска има и 4 бронзени медали.
Русија останува на 8 злата од кои дури 7 се во ерата на СССР, а денеска го освоија третото сребро. Имаат и 2 бронзи.
Синоќа во борбата за бронзата убедлива победа оствари пријатното изненадување Словачка декласирајќи ја Шведска со 4:0. Токму Словакот Јурај Слафковскиј заврши како најдобар стрелец на турнирот со 7 гола, додека неговиот колега Патрик Рибар со 96,58% одбранети удари е најдобриот голман.