Светскиот шампион во тешка категорија Тајсон Фјури вели дека прв ќе се пријави во војска и ќе оди во војна против Русија доколку Англија или САД се вмешаат во конфликтот во Украина, како одговор на одлуката на браќата Кличко и Олександр Усик.
Овие Украинци се пријавија во војска за да ја бранат татковината додека трае руската инвазија, а на новинарско прашање што мисли за нив и каков е неговиот став по тоа прашање, Фјури изјави дека тој прв би војувал доколку неговата земја се вмеша во конфликтот.
„Јас ќе бидам првиот кој ќе се пријави во војска ако Англија или САД се вмешаат во војната. Ќе бидам во првите редови за таа работа. Татко ми исто така ќе се приклучи, како и сите други. Ако живееш во таа држава, брани ја, тоа е сè што имам да кажам“, изјави Фјури пред новинарите.
Фјури минатата година ја одбрани титулата на светски шампион во тешка категорија, откако со нокаут го совлада Дионтеј Вајлдер.
