По долги преговори конечно се договорени условите за дуелот меѓу Тајсон Фјури и Дилијан Вајт. Борбата е закажана за 23 април на Вембли во Лондон.
Британскиот боксер Тајсон Фјури ќе ја брани шампионската титула по ВБЦ верзија во тешка категорија против сонародникот Дилијан Вајт, објави Sky Sport. Во текот на викендот, Вајт преговараше за деталите на договорот, а го потпиша неколку часа пред истек на рокот.
Фјури за овој меч ќе заработи гарантирани 30 милиони долари, а Вајт 7.5 милиони. За победникот следува и бонус од 4 милиони долари.
Со оглед на тоа што во Англија се укинати скоро сите епидемиолошки мерки се очекува Вембли во Лондон да биде исполнет до последно место.
Вајт минатата година во борбата за ВБЦ појасот го победи рускиот боксер Александр Повјеткин, додека Фјури ја одбрани титулата во тешка категорија минатиот октомври откако во 11 рунда со нокаут го победи Американецот Дионтеј Вајлдер.
Фјури има 33 борби од кои 32 победи и една нерешена, а Вајт од 30 меча има 2 пораза. Победникот од оваа средна би можел да се бори за обединување на сите појаси против победникот од реваншот меѓу Украинецот Александр Усик, шампион во ВБА, ВБО, ИБФ и ИБО верзии и Британецот Ентони Џошуа.
Овој меч исто така треба да се случи на пролет.
На Twitter Тајсон Фјури реагираше на веста дека Дилијан Вајт конечно го потпишал договорот за нивната борба. Во видеото тој се потсмева дека Вајт потпишал за 8 милиони долари, најголемата сума што некогаш ќе ја добие во животот, смета Фјури.
