Франција денеска ги укина повеќето ограничувања за коронавирусот, како што е обврската за носење маски на повеќето јавни места и забраната на невакцинирани лица да влегуваат во барови, ресторани и кина.
Одлуката е донесена на помалку од еден месец пред првиот круг од претседателските избори и во време кога бројот на новозаразени повторно расте, па некои научници се прашуваат дали не е рано да се ублажат мерките.
„Можеме да дишеме и да мирисаме мириси што ги немавме мириснато веќе подолго време“, рече градежниот работник Жан-Ив Ричард.
Виржини де Бушер, банкар, рече дека укинувањето на обврската за носење маски на работното место е олеснување.
„Се чувствувам полесно, можеме повторно да ги видиме насмевките на луѓето“, рече таа.
Маските повеќе не се задолжителни во училиштата, канцелариите и продавниците, а остануваат задолжителни во болниците и јавниот превоз. Потврдите за вакцинација повеќе нема да треба да се покажуваат за влез во барови, ноќни клубови, музеи, стадиони и меѓуградски возови.
Франција вчера потврди повеќе од 60.000 нови инфекции, една третина повеќе од истиот ден една недела порано. Жан-Франсоа Делфраиси, шеф на научниот совет кој ја советува владата за пандемијата, повика на претпазливост и истакна дека ризичните групи луѓе треба да продолжат да носат маски.
„Пандемијата сè уште не е завршена“, нагласи Делфраиси.