Интер синоќа не успеа да дојде до својата четврта титула во Лигата на шампионите откако и покрај пружениот одличен отпор против силниот фаворит Манчестер Сити загуби со минимални 1:0.
По натпреварот пред микрофоните седна тренерот Симоне Инѕаги, која мораше да собере сили и да ги каже своите импресии.
„Имавме одличен натпревар и треба да се гордееме со тоа. Не смееме да се задржуваме на тоа што можеше да биде, заслуживме повеќе. Го прегрнав секој од моите играчи, еден по еден, затоа што беа извонредни, исто како и нашите навивачи кои заслужија поинаков резултат, но се надевам дека беа задоволни од начинот на кој играше тимот“, изјави Инѕаги.
„Топката како да не сакаше да влезе во голот. Се случува, за жал, ни се случи во финалето на Лигата на шампионите. Ја погодивме пречката, топката беше исфрлена на гол-линијата, удар запре наш играч, се случија секакви работи... Со ваков дух, организација и посветеност, верувам дека во иднина ќе бидеме повторно тука“.
До финалето Истанбул, Инѕаги победи на седум од претходните осум финалиња. Имаше загубено само во своето прво финале уште кога го водеше Лацио, во Копа Италија 2017 година. Оттогаш, прво со Лацио освои два Суперкупа на Италија, еднаш Копа Италија, па со Интер освои два Суперкупа и двапати Копа Италија.
„Чудно е чувството, морам да се навикнам, но ги прегрнав играчите. Ретко зборувам веднаш по натпревар, чекам ден-два, но денеска им реков дека треба да се гордеат со постигнатото. Тие му покажаа на целиот свет колку добро поминаа против Манчестер Сити, тим чиј квалитет сите многу добро го знаат. Многу сум горд на играчите и навивачите. Заслуживме повеќе, но капа за Манчестер Сити, знаеме како напорно работеа во претходните сезони за да дојдат до овој момент“, повтори уште еднаш Симоне Инѕаги.
На Инѕаги му истекува договорот со Интер, сезонава често се шпекулираше за негова смена, а тимот страдаше поради тоа. Денеска сите зборуваат за нов договор, а тој вели:
„Играчите и јас бевме напаѓани во текот на сезоната, понекогаш со причина, понекогаш не, но научивме од тие порази. Освоивме четири трофеи и игравме во финалето на Лигата на шампионите. Во контакт сум со клубот, ќе се состанеме и ќе ја испланираме иднината. Немаше многу време за разговор во текот на сезоната“.