Ирачката разузнавачка служба го уапси Абдул Насер Кирдаш, еден од лидерите на Исламската држава, кој важел за најсериозен кандидат за наследник на Абу Бакр Ал-Багдади на чело на џихадистичката група.
– Денеска е уапсен терористот Абдул Насер Кирдаш, кој требаше да го наследи злогласниот Ал-Багдади на чело на ИД. Апсењето е извршено благодарејќи на прецизни разузнавачки податоци, се наведува во соопштението на ирачката Национална служба за безбедност.
Кирдаш требало да го замени Ал-Багдади, кој загина во акција на американските сили во сирискиот град Идлиб во октомври минатата година.
Апсењето на Кирдаш е извршено само еден месец откако поранешниот шеф на ирачката разузнавачка служба Мустафа Ал-Кадими ја презеде премиерската функција во Ирак.
