Италијанците сè уште не се помирени со, за нив, срамниот пораз од Македонија во полуфиналето од баражот за пласман на Светското првенство.
Европскиот шампион ќе го пропушти второто Светско првенство во низа откако во баражот за Русија беше исфрлен од Шведска. Но, Италијанците сè уште се надеваат дека ќе успеат да се најдат во Катар за што има минимални шанси.
Иранската фудбалска федерација се најде во фокусот на ФИФА откако на последниот квалификациски натпревар против Либан во Машдад на жените не им беше дозволен влез на стадионот. На социјалните мрежи се проширија снимки на кои полицијата употреби солзавец пред стадионот за да растера околу 2.000 жени кои уредно купиле билети за натпреварот и сакале да го следат настапот на нивната репрезентација.
Можни санкции
Членот на иранската фудбалска асоцијација Мехрдад Сердаски потоа објави на Twitter дека слушнал загрижувачки вести од ФИФА и Азиската фудбалска федерација (АФЦ), шокирани од ваквата полициска акција.
Иранците стравуваат од казната на ФИФА, а најдрастично би било исфрлањето од Мундијалот поради кршење на човековите права, за кое шансите се многу мали, но постојат.
Mediaset пишува дека во случај Иран да биде исфрлен од Мундијалот, ФИФА би можела да одлучи наместо таа земја првата следна репрезентација на рангирањето која не се пласирала да оди во Катар, а тоа би била Италија.
„Ваква драстична казна е малку веројатна и се граничи со научна фантастика. Не можеме да очекуваме дека Иранците ќе бидат исфрлени од Светското првенство, но ова е последна шанса за Италија да го види Светското првенство“, пишуваат италијанските медиуми.
ФИФА сè уште официјално не го објавила инцидентот во Иран, но со години врши притисок врз таа земја да им дозволи на жените пристап до натпреварите. Иран повремено пушташе мал број жени на стадионите за помалку или повеќе да ги исполни барањата на ФИФА, но сега може да биде строго казнета, тврдат италијанските медиуми.