Јапонската даночна агенција распиша конкурс за идеи со кои би ги поттикнала младите Јапонци повеќе да консумираат алкохол за да ја подобрат економската состојба во државата, пренесе BBC.
Според независни истражувачи, младите Јапонци консумираат многу помалку алкохол од нивните родители, што претставува удар при собирањето даноци од високо оданочена роба како што е на пример јапонското саке, вино од ориз.
Во распишаниот конкурс се бара од Јапонците на возраст меѓу 20 и 39 години да предложат како би ја зголемиле консумацијата на алкохол меѓу својата генерација. Од оние кои ќе одлучат да учествуваат на конкурсот се бараат идеи за рекламирање, брендирање, но и оригиналност која би подразбирала употреба на AI технологија.
Како што истакнаа од организацијата, навиките воведени во текот на пандемијата довеле до значително намалување на консумирањето алкохол меѓу помладата популација.
Во текот на 80-тите години од минатиот век, околу 5 проценти од јапонските даночни приходи доаѓале од продажба на алкохол, а денес тоа изнесува само 1,7 проценти. Според Светска банка, дури 29 проценти од јапонската популација се постари од 65 години.
