Во среда ќе падне конечната одлука за оваа понуда на Серија А која е многу подобро решение од првичното за играње на 13 мај.
Синоќа Серија А и претставници на двата клуба одржаа состанок на кој ги разгледаа сите опции за одигрување на одложеното Дерби д'Италија.
„Помина огорченоста поради она што се случи и поради начинот на кој се дојде до оваа апсолутно ненадејна одлука. Мислам дека лутината не е само на управата и на навивачите на Интер, туку на сите навивачи на сите тимови. Погодени се десет клубови и верувам дека е нормално да има вознемиреност и горчина. По ненадејната одлука на Лега Калчо во саботата, Интер побара неформален собир на Советот кој се одржа синоќа за да се свика вонредна седница каде Серија А ќе понуди два-три датуми за одигрување на одложените натпревари, понуди кои ќе бидат разгледани. Потоа собранието ќе донесе одлука бидејќи важно е првенството регуларно да продолжи“, вели Џузепе Марота, извршниот директор на Интер.
Веќе излезе дека решението на Серија А за големото дерби ќе биде 9 март. Тоа значи дека Интер - Сасуоло и Болоња - Јувентус од наредниов викенд нема да се одиграат туку многу е веројатно тие да бидат закажани за 13 мај, првичниот датум за дербито. Интер не сака да игра дерби на 13 мај бидејќи тогаш има пеколен распоред: Фиорентина, Џеноа, Наполи па Аталанта, а Јуве треба да биде на средина.
„Сакаме да се донесе одлука колку што е можно побрзо за да можат играчите и тренерите да се подготват на нормален начин. Верувам во сериозноста на сите инволвирани. Сигурен сум дека во среда ќе најдеме заеднички јазик и дефинитивмо ќе го решиме овој вонреден период во земјава. Свесни сме дека пред сѐ доаѓа здравјето на граѓаните, на фудбалерите и на сите останати“, заврши Марота за Gazzetta dello Sport.
За Јуве ова е прв одложен натпревар, додека Интер веќе има два за одигрување. Вкупно 10 натпревари од последните две кола се одложени поради превенција од ширењето на корона вирусот во Италија и за кои допрва треба да се најде слободен датум. Проблем за натпреварите на Интер и Јувентус е тоа што и двата тима се во игра во Копа Италија и во Лига Европа односно Лигата на шампионите.
